لطالما كنت معجبة بنموذج البسّاطة من بعيد، مايقيدها شي أنها تبسّط، بأي برحه، بأي أرض، ألزم ماعليها رغبتها و مزاجها، مافوقها مدير يلزمها و لا عندها نظام واضح يربطها، نشيدها الوطني “أن جت؟ خل تجي على ماتجي”، ماتملك حِمل داخلها يسائلها وينك ماجيتي؟ ليش غيرتي مكانك؟ وين رحتي و ليش قطعتي
و من هالمنطلق هي تبسّط
رغبتها بالفلة و الوناسة المعنوية مع باقي البسّاطات هذي وحده، و يمكن حاجتها المادية لإعالة نفسها و أسرتها هذي اثنين” و لو أنها ثقيلة عليها أحياناً” .
البسّاطة تضحي بصورتها قدام المجتمع و أقنعته، لأنها تدري ولا قناع منهم بيوكلها عيش، تشربت مفهوم” ما لأحدٍ عندي شي”
البسّاطة بالرغم من هذا كله، تشبهني..
لكن الفرق أني ما أبسط عن حاجة مثلها، أبسط عن إمتلاء.. ما أبيع شي بمقابل مادي، بقدر رغبتي بالمجتمع الي حولي و بنفس الفلة و الوناسة الي تخليها تبسّط أحياناً، أنا أستعرض أشيائي الي أعزها و ما أبيعها، و أتوق لفكرة أن أحد يشوفها بجمالها و ينتبه لها مثلي .
بس أخاف .. و خوفي هذا يشبة خوفها
أن جزء منها مجلّسها على آمل أحد يطلّ عليها.. و يشري منها و يشوفها، و وجود إحتمالية ضيف يمر يحتقرها، يكسر أغراضها، و يكاسرها و صولاً إلى أنه يحاججها ! تخوفها زود
و من هنا هي دائماً مستعدة تفرك، مب لأنها تترقب ريحة أحد يهددها بالبلدية و النظام .. بقدر ماتستثقل الشرهه و المسائلة، الشرهه من الي حولها، و المسائلة من إحتمالية وجود أشخاص فوقها.. هذا خوفها الي يزيد إنكماشها.
هالمقاله الي تقرونها اتوقع اني دقرت فيها واجد
الي يكتب، و مارس الكتابة و لو بشكل بسيط بيعرف أن الكتابة كفيله انها تعرّيه.. و هالشي مكلف، خصوصاً على صعيد شخصي.
انا أعتبر نفسي أكثر من يطبّل للوضوح، و لكن لا انكر، يغريني جزء من الغموض أعتبره الشي الوحيد الي يسمح للي قدامي بمساحة من الخيال
لكن في سبيل أني افتح شي لطالما كان ودي فيه؟ مافي اخذ بدون عطا
صادف رغبتي هذي اني قرأت أبيات شعرية تقول
لاصار مايدري بخافيك غيرك
مرتاح لو انك عن الدرب غادي
و اليا ظهر خافيك للناس بينت
يمكن يجيك من القريب انتقادي
مب مشكلتي الإنتقاد لا مع القريب و لا البعيد
مشكلتي رغبتي الدائمة حول اني أحافظ على صورة ما أعرف وش هي
كأني أتحفظ على طريقة فكري، و الزاوية الي أنظر لها من الحياة، طريقة تعاملي مع الأشياء ممكن تفضح نشأتي، مسقط راسي، و إملائي يفضح مستواي
اتذكر فيه واحد كان يتابعني قبل هالمدونة، دايم يقولي لاتسوين محنكة نحو عشانك تستخدمين الشدة.
حقنه.. مدري وش يبي
و انا الودّ ودي أعترف أن للآن عندي لبّس بينها وبين السكون، و يعتريني شعور من العاااار افا، شلون خريجة صحافة و للحين عندك أخطاء إملائية!!!!
و أتذكر بمشروع تخرجي كنت حريصة جدا ما اغلط بالإملاء لأن هذا يعتبر من ابرز اعمالي الي تبرز مهاراتي صحفياً، جاء واحد كتب لي بعد سته و عشرين منشور, مدققاً على همزة زائدة بالغلط ” الإملاء كارثي ” .
ودّي اني دخلت عليه خاص على نهج خوينا الموظف بأحد شركات الاتصالات، و قليل من بيعرفه.. بس تذكرت اني انا و ياه بشر
ذكري للموضوع عندكم يعني اني تصالحت معه، لو حصل بالغلط و جذبت مهووسين التدقيق النحوي فا من الآن أتقدم بشكري لكم على شرط ان يكون التصحيح على إنفراد و بألطف المعاني .
و بعتبركم محل دكاترتي الي ماعلموني نحو زين بالجامعة .
البسّاطة ..
تعودت تتوجس بمكانها و تصدق ظنونها، عشان تحط رجلها، و مرجعيتها الأولى أنها تشّور على نفسها
أعترف أني تشكّلت بطريقة تشبهها و لأول مره .. ماراح افرك
البساطة في نهاية المطاف علمتني أن مب كل برحه ينبسط بها .
معجم البسّاطة :
برحه: أرض واسعة – خالية
تفرك / أفرك : تهرب – أهرب
حقنه : وصف لشخص بثر – ثقيل دم